Arlind Boshku dhe Dritan Burgija kanë mbërritur në selinë e Partisë Demokratike për të kundërshtuar vendimin për përjashtimin e tyre nga grupi demokrat i këshilltarëve në Këshillin Bashkiak të Durrësit.
Ata kërkuan sqarime lidhur me mënyrën se si është marrë vendimi dhe shprehën pakënaqësinë për përjashtimin e tyre. Dritan Burgija, kreu i grupit të këshilltarëve, dhe Arlind Boshku, sekretar i degës së PD në Durrës, kërkuan një ballafaqim me kreun e PD, Sali Berisha, duke e konsideruar vendimin ndaj tyre të padrejtë.
“Duam shpjegime për përjashtimin tim dhe Arlind Boshkut, kolegut tim. Nuk është çështje pozicionesh, por dinjiteti. Çdo rresht i vendimit është anti-statutor,” deklaroi Burgija, duke kërkuar fakte dhe prova që çuan në shkarkimin e tij.
Ata theksuan se akuzat ndaj tyre janë shumë të rënda dhe kërkuan një diskutim të drejtpërdrejtë me lidershipin e partisë.
