Sekretari amerikan i Mbrojtjes, Pete Hegseth, ka deklaruar se nuk është i shqetësuar për përpjekjet për shkarkimin e tij nga detyra, duke shprehur njëkohësisht mbështetje të plotë për presidentin Donald Trump dhe vendimet e administratës së tij.
I pyetur nëse gëzon mbështetjen e nevojshme të republikanëve për të përballuar mocionin e shkarkimit, Hegseth minimizoi shqetësimet dhe theksoi se është i gatshëm të mbrojë vendimet dhe veprimet e ndërmarra gjatë drejtimit të Pentagonit.
“Ne nuk jemi të shqetësuar për këtë”, deklaroi Hegseth, duke lënë të kuptohet se përpjekjet për largimin e tij nuk përbëjnë shqetësim për administratën.
Sekretari amerikan i Mbrojtjes doli gjithashtu në mbrojtje të presidentit Donald Trump, duke vlerësuar vendimet e tij në fushën e sigurisë dhe operacioneve ushtarake.
“Nuk mund të jem më krenar për atë që ka bërë presidenti ynë, vendimet që ka marrë dhe telefonatat e guximshme që ka bërë”, u shpreh Hegseth.
Ai akuzoi demokratët se po përdorin çështjen për qëllime politike, ndërsa argumentoi se kritikat ndaj operacioneve ushtarake të administratës Trump prekin edhe ushtarakët që zbatojnë urdhrat.
Deklaratat e Hegseth vijnë në një kohë kur kongresmeni republikan Thomas Massie po përpiqet të përshpejtojë votimin në Dhomën e Përfaqësuesve për mocionin e shkarkimit të tij.
