Franca ka akuzuar Iranin se qëndron pas një sulmi të gjerë kibernetik ndaj qindra supermarketeve në territorin francez, duke shkaktuar dëme ekonomike prej miliona eurosh si pasojë e prishjes së sasive të mëdha të produkteve ushqimore.
Ministri i Jashtëm francez, Jean-Noël Barrot, deklaroi gjatë një konference për shtyp se Parisi e konsideron Teheranin përgjegjës për sulmin dhe paralajmëroi se veprime të tilla do të kenë pasoja.
Sipas autoriteteve franceze, sulmi kibernetik, i ndodhur gjatë muajit të kaluar, kishte në shënjestër sistemet e ftohjes në qindra supermarkete. Ndërhyrja në sistemet elektronike shkaktoi rritjen e temperaturave në frigoriferë dhe ngrirës, duke bërë që sasi të mëdha ushqimesh të freskëta dhe të ngrira të prisheshin.
Si pasojë, dëmet financiare për bizneset e prekura vlerësohen në miliona euro.
Ndërkohë, Prokuroria e Parisit ka nisur hetime ndaj drejtuesit të një njësie të dyshuar për sulme kibernetike, e cila besohet se ka lidhje me Gardën Revolucionare Islamike të Iranit.
Autoritetet franceze po hetojnë për të zbardhur plotësisht mënyrën e realizimit të sulmit dhe personat përgjegjës.
Ngjarja ka ngritur shqetësime serioze për sigurinë e sistemeve teknologjike që përdoren në sektorin ushqimor dhe rrezikun e dëmeve të mëdha ekonomike nga sulmet kibernetike.
