Banorë të Memaliajt dhe Fushë-Arrëzit kanë protestuar këtë të premte para Kryesisë së Kuvendit, duke kundërshtuar ndryshimet e propozuara në hartën e re administrativo-territoriale.
Protestuesit kërkuan që zëri i komuniteteve lokale të dëgjohet përpara marrjes së vendimit përfundimtar, duke theksuar se ndryshimet nuk duhet të miratohen pa u marrë në konsideratë interesat dhe nevojat e banorëve të zonave të prekura.
Sipas propozimit të mazhorancës për Reformën Administrativo-Territoriale 2.0, Memaliaj parashikohet të bashkohet me Tepelenën, ndërsa Fushë-Arrëzi me Pukën.
Banorët kundërshtojnë humbjen e statusit aktual të bashkive të tyre dhe kërkojnë që procesi të shoqërohet me konsultime të drejtpërdrejta me qytetarët.
Drafti i reformës parashikon reduktimin e numrit të bashkive në vend nga 61 në 46, përmes bashkimit të disa njësive ekzistuese.
