Departamenti Amerikan i Thesarit ka njoftuar sanksionimin e organizatës së krimit të organizuar “Hysa”, me në krye biznesmenin Luftar Hysa, për përfshirje në pastrimin e parave të kartelit meksikan “Sinaloa”. Sipas njoftimit, “Grupi i Krimit të Organizuar Hysa (HOCG) u godit sot pas një pune të përbashkët mes Shteteve të Bashkuara dhe Qeverisë së Meksikës”, ndërsa familja shqiptare akuzohet se ka përdorur rrjetin e saj të kazinove dhe restoranteve si mbulesë për shpëlarjen e parave të trafikut të drogës.
Në deklaratën e Thesarit thuhet gjithashtu se Luftar Hysa është “i vendosur midis Meksikës dhe Kanadasë” dhe “shfaqet shpesh në media si një anëtar kryesor i familjes Hysa, duke dhënë intervista mbi bizneset e familjes në Meksikë dhe Evropë.”
Hysa është njohur për publikun shqiptar përmes një interviste në emisionin “Opinion”, ku foli edhe për takimin e tij me kryeministrin Edi Rama. Në atë intervistë, ai tha se e kishte kërkuar takimin për një projekt artistik që synonte promovimin e Shqipërisë përmes një libri me fotografi.
“Kam dashur ta takoj Edi Ramën për një histori shumë të bukur. Kam një mik nga Anglia, fotografin Max Miligan, që donte të bënte një libër për Shqipërinë për të promovuar turizmin. Si artist që është, mendova se Rama mund të mbështeste këtë projekt,” deklaronte Hysa në “Opinion”, duke shtuar se prezantimin me Ramën e kishte bërë “një mik gjerman, mik i mirë i Shqipërisë”.
Sipas Departamentit të Thesarit, Luftar Hysa dhe tre vëllezërit e tij – Arben, Fatos dhe Fabjon Hysa – kanë përdorur investime në biznese dhe kazino në Meksikë për të pastruar fitimet e trafikut të drogës. Autoritetet amerikane dhe meksikane zbuluan se grupi ka bashkëpunuar me kartelin famëkeq “Sinaloa”, si dhe me shtetas amerikanë për transportimin e sasisë së madhe të parave në dorë nga Meksika drejt SHBA-së për qëllime pastrimi.
