Masakra e Kozarës mbërrin për të tretën herë në 20 vite në Gjykatën Kushtetuese. Me datë 2 prill kjo gjykatë do të shqyrtojë në seancë plenare, mbi bazë dokumentash, kërkesën e Luan Marrës, i cili është i dënuar me burgim të përjetshëm për vrasjen e vëllait, kunatës shtatzënë dhe fëmijës së tyre 2-vjeçar.
Ai kërkon shfuqizimin si të papajtueshëm me Kushtetutën të vendimeve të vitit 2004 në Gjykatën e Lartë, atij të vitit 2020 të Gjykatës së Apelit dhe vendimit të 12 marsit 2018 të Gjykatës së Beratit, si dhe heqjen e dënimit me burgim të përjetshëm për masakrën e 9 shkurtit 2006.
Më herët Gjykata Kushtetuese, përmes dy vendimeve në vitet 2011 dhe 2016, i ka bërë nul vendimet e gjykatave që e kishin cilësuar fajtor Luan Marrën për krimin monstruoz, për shkak të një dëshmie të marrë në mungesë të avokatit.
Masakra e Kozarës ndodhi më 9 shkurt 2006, kur Shpëtim Marra u gjet i vrarë në divanin e shtëpisë së tij. Në ambientet e tjera të shtëpisë u gjetën të vrara gruaja e Shpëtimit, 4 muajshe shtatzënë, si dhe djali 2-vjeçar i çiftit.
Luan Marra u shpall fajtor me burgim të përjetshëm për vrasjen e vëllait Shpëtim Marra, kunatës së tij shtatzënë dhe nipit të mitur.
Prokuroria përgjatë 20 viteve ka këmbëngulur se Luan Marra është autor i masakrës me tre viktima, ndërsa familja e kundërshton një fakt të tillë.
I dënuari Marra, në një dëshmi të dhënë më 30 tetor 2006, e pranoi autorësinë e krimit dhe më pas u tërhoq.
Pikërisht kjo dëshmi e futi çështjen në një rreth vicioz. Sepse Gjykata Kushtetuese në vitin 2011 e riktheu procesin në pikë zero, duke argumentuar se dëshmia i ishte marrë të dyshuarit pa praninë e një avokati.
Në vitin 2016 Gjykata Kushtetuese gjeti shkelje të rënda në proces dhe e zhbëri sërish dënimin e përjetshëm për Luan Marrën. Ai u dënua në vitin 2018 nga Gjykata e Beratit, verdikt që mbeti në fuqi edhe në Apel dhe në Gjykatën e Lartë.
Pas dy dekadash, Kushtetuesja do të marrë në shqyrtim sërish masakrën e Kozarës.
