Gjykata Kushtetuese ka rrëzuar kërkesën e ish-kreut të Autoritetit Rrugor Shqiptar (ARRSH), Evis Berberi, për rishikimin e masës së arrestit në burg. Si pasojë, ish-vartësi i ish-ministres së Infrastrukturës dhe Energjisë, Belinda Balluku, do të vijojë të mbetet në qeli.
Sa i përket pretendimeve të tjera të Berberit lidhur me papërdorshmërinë e provave të nxjerra nga celulari i tij, Gjykata Kushtetuese nuk i ka marrë ato në shqyrtim. Sipas vendimit, ai duhet t’i drejtohet për këtë çështje Gjykatës së Shkallës së Parë.
Evis Berberi u arrestua më 14 mars 2024, nën akuzat për korrupsion dhe pastrim parash. Sipas Prokurorisë së Posaçme (SPAK), ai dyshohet se është përfshirë në raste korruptive që lidhen me tetë tendera, me një vlerë totale rreth 5 milionë euro.
SPAK dyshon se Berberi, fillimisht në detyrën e drejtorit të Efiçencës së Energjisë, ka zhvilluar tre procedura prokurimi me vlerë rreth 1.2 milionë euro, të cilat janë fituar nga kompania DAAM, e drejtuar nga Valter Begaj, por që sipas hetimeve në fakt kontrollohej nga vetë Berberi.
Po sipas prokurorisë, edhe gjatë kohës kur Berberi drejtonte Autoritetin Rrugor Shqiptar, e njëjta kompani ka fituar tre tendera të tjerë me vlerë rreth 1 milion euro.
Hetimet kanë zbuluar gjithashtu se kompania DAAM është përdorur për transferimin e shumave të mëdha të parave nga kompania tjetër “Net Group”, në pronësi të sipërmarrësit Begaj, përmes një sërë transaksionesh financiare.
Sipas SPAK, këto para janë përdorur më pas për blerjen e pronave të paluajtshme në emër të kompanisë DAAM, çka ka ngritur dyshime për një skemë të mundshme pastrimi parash.
Transaksionet nga “Net Group” drejt kompanisë DAAM, që sipas hetimeve kontrollohej indirekt nga Berberi, përkojnë me periudhën kur “Net Group” rezultoi fituese e disa tenderave të shpallur nga Agjencia për Efiçencën e Energjisë dhe nga Autoriteti Rrugor Shqiptar, gjatë kohës që këto institucione drejtoheshin nga Berberi.
