Një lokal në Ksamil, i identifikuar si “Bumble Bee”, është djegur plotësisht rreth orës 03:10 të mëngjesit të sotëm. Sipas Policisë, lokali me konstruksion druri ishte marrë me qira nga shtetasi K. I., ndërsa grupi hetimor po punon për të zbardhur shkaqet dhe rrethanat e ngjarjes.
Ngjarja ka ngritur dyshime të forta për një lidhje të mundshme me konfliktin kriminal ku është përfshirë 42-vjeçari Ramadan Zoto, i njohur edhe si Ramadan Canaj. Ky i fundit akuzohet për plagosjen e dy personave më 17 korrik në Sarandë, të dy të afërm të të shumëkërkuarit Ervis Lami.
Sipas hetimeve paraprake, pas plagosjes së dy djemve nga Kamza, përplasja ka vijuar me një akt tjetër të rëndë: ekzekutimin me eksploziv të Isuf Jacajt, babait të Klaus Jacajt, i cili dyshohet se ndihmoi Ramazan Canajn të largohej nga vendngjarja pas plagosjes.
Aktualisht, nuk ka të dhëna zyrtare që e lidhin zjarrin në Ksamil me sagën kriminale, por pista e hakmarrjes nuk përjashtohet, për shkak të përshkallëzimit të ngjarjeve në javët e fundit.
Njoftimi zyrtar i Policisë së Sarandës:
“Sarandë/ Rreth orës 03:10, në Ksamil, ka rënë zjarr dhe është djegur plotësisht një lokal me konstruksion druri, i marrë me qira nga shtetasi K. I.. Grupi hetimor po punon për zbardhjen e rrethanave të ngjarjes dhe të shkakut të rënies së zjarrit.”
