Në mes të përplasjes mes Iranit dhe Shteteve të Bashkuara, beteja nuk zhvillohet vetëm me armë, por edhe në rrjetet sociale. Një nga figurat më aktive në këtë front është Mohammad Bagher Ghalibaf, kreu i parlamentit iranian dhe ish-gjeneral i Gardës Revolucionare, i cili është shndërruar në një nga përdoruesit më agresivë të platformës X.
Më 30 mars, ndërsa Donald Trump publikoi një koment optimist për çmimin e naftës në hapjen e tregjeve financiare, Ghalibaf iu drejtua më shumë se 500 mijë ndjekësve të tij me një mesazh ironik. Ai paralajmëroi se “të vërtetat” para hapjes së tregjeve shpesh janë vetëm një pretekst për të fituar para dhe sugjeroi të bëhej e kundërta e asaj që tregu duket se sugjeron.
Postimi u shpërnda edhe nga figura të njohura të financës amerikane, duke e kthyer ndërhyrjen e tij në një episod viral. Por për analistët, ky nuk ishte një gjest simpatik apo një koment ekonomik, por pjesë e luftës së propagandës që po zhvillohet paralelisht me konfliktin ushtarak.
Në këtë përballje digjitale përdoren meme, postime me shkronja të mëdha, ironi dhe video të krijuara me inteligjencë artificiale për të diskredituar kundërshtarin dhe për të forcuar narrativën e vet.
Paradoksi është se ndërkohë që Ghalibaf është bërë një nga zërat më aktivë në rrjetet sociale, shumë iranianë kanë pasur qasje të kufizuar në internet për më shumë se një muaj. Disa dyshojnë se profili i tij menaxhohet nga një ekip komunikimi, por rëndësi ka efekti: të manipulohet perceptimi i luftës dhe të sfidohen publikisht deklaratat e Trump.
Në një nga postimet e tij, Ghalibaf ironizoi edhe situatën ekonomike në SHBA, duke cituar një artikull për amerikanë që po reduktojnë shpenzimet për shkak të rritjes së çmimit të karburanteve. “Kjo është ajo që ndodh kur liderët vendosin të tjerët mbi qytetarët amerikanë. Nuk është më ‘America First’… është ‘Israel First’”, shkroi ai.
Pas rrëzimit të dy avionëve amerikanë nga Irani, ai publikoi një tjetër koment sarkastik: “Lufta brilante pa strategji që ata nisën tani është degraduar nga ‘ndryshim regjimi’ në ‘Hej! A mund të gjejë dikush pilotët tanë?’”.
Përplasja në rrjetet sociale është bërë një pjesë e rëndësishme e konfliktit. Ndërsa Trump përdor shpesh gjuhë hiperbolike dhe deklarata me shkronja kapitale, kampi iranian i përgjigjet me meme, video satirike dhe përmbajtje të krijuar me inteligjencë artificiale që tallin kundërshtarin.
Në disa nga videot më të shpërndara, të krijuara me AI dhe të stilizuara si filma vizatimorë, Trump paraqitet si figurë groteske e manipuluar nga forca të errëta, ndërsa Irani paraqitet si fitues i përplasjes.
Në këtë mënyrë, përveç luftës së raketave dhe avionëve, po zhvillohet edhe një tjetër front: lufta për narrativën, ku rrjetet sociale janë kthyer në një armë propagande po aq të rëndësishme sa edhe arsenalet ushtarake.
