Historia e aktores amerikane Laura Orrico po bën xhiron e botës dhe ka hapur një debat të gjerë mbi kufijtë e fekondimit pas vdekjes.
Më 5 shkurt 2026, në moshën 49-vjeçare, ajo solli në jetë vajzën e saj të parë, Aviana Rose, të konceptuar përmes fekondimit in vitro duke përdorur spermën e bashkëshortit të saj, Ryan Cosgrove, i cili kishte ndërruar jetë dhjetë vite më parë.
Orrico dhe Cosgrove u njohën në vitin 1999 dhe u martuan në 2004. Pak vite më vonë, Cosgrove u diagnostikua me tumor në tru. Me këshillën e mjekëve, çifti vendosi të ruante spermën e tij përmes kriokonservimit në vitin 2007, në rast se do të dëshironin të kishin fëmijë në të ardhmen.
Cosgrove ndërroi jetë në vitin 2015, në moshën 39-vjeçare, por kishte lënë një autorizim të qartë ligjor që bashkëshortja e tij të mund ta përdorte spermën e ngrirë edhe pas vdekjes së tij.
Pas disa marrëdhënieve dhe disa aborteve spontane, Orrico vendosi të vazhdonte procedurën e fekondimit të asistuar, duke marrë edhe mbështetjen e familjes së bashkëshortit të ndjerë. Shtatzënia rezultoi e suksesshme që në përpjekjen e parë.
Aktorja e ka përshkruar vajzën e saj si një “mrekulli” dhe ka thënë se ajo i ngjan shumë të atit.
Rasti ka ringjallur diskutimin mbi përdorimin e spermës së ruajtur pas vdekjes së partnerit, një praktikë që në disa vende është e lejuar, ndërsa në të tjera mbetet e kufizuar ose e ndaluar nga ligji.
