Gjykata e Apelit të Posaçëm do të vendosë nesër për fatin e Ergys Agasit, i cilësuar si kreu i një grupi të strukturuar kriminal që vepronte brenda AKSHI-t, dhe Ulian Shpatarakut, ish-zyrtarit të Policisë së Shtetit që u arrestua teksa shoqëronte të shumëkërkuarin.
Gjatë seancave që u zhvilluan veçmas nga njëra-tjetra, të dy kërkuan zbutje të masës së sigurisë nga “arrest me burg” në një masë më të lehtë sigurie. Shpataraku kërkoi njëherazi edhe ndarjen e çështjes dhe hetimin e mëtejshëm nga Prokuroria e Durrësit, pasi akuzohet vetëm për veprën penale “përkrahja e autorit të krimit”.
Gjykata nuk mundi të dalë me një vendim, por pritet ta shpallë atë të martën. Agasi akuzohet për vepra të rënda penale, si konkurrencë e paligjshme përmes dhunës, heqje e paligjshme e lirisë, korrupsion, pastrim parash e grup kriminal. Ai, në bashkëpunim me Ermal Beqirin, urdhëronin rrëmbimin e biznesmenëve dhe, përmes kërcënimit, i detyronin të hiqnin dorë nga tenderat e AKSHI-t.
