Nga Desada Metaj
VNA ka zbardhur argumentet mbi të cilat Këshilli i Ministrave i kërkon Gjykatës Kushtetuese pezullimin e vendimit të Gjykatës së Posaçme për çështjen “Balluku”.
Siç është bërë e ditur, me vendim të Gjykatës së Posaçme zëvendëskryeministrja dhe Ministrja e Infrastrukturës dhe Energjisë, Belinda Balluku, është pezulluar nga detyra dhe i është ndaluar e drejta për të udhëtuar jashtë vendit, pasi është e pandehur për abuzime me tenderin e ndërtimit të tunelit të Llogarasë dhe të lotit 4 të Unazës së Madhe.
Kryeministri, me kërkesën e dorëzuar në Gjykatën Kushtetuese, ka 3 pretendime. Pretendon fillimisht se është krijuar midis tij dhe GJKKO-së një konflikt kushtetues i cili duhet të zgjidhet nga Gjykata Kushtetuese. Së dyti, kërkon shfuqizimin e vendimit të GJKKO-së vetëm në pjesën që lidhet me masën ndaluese “pezullim nga ushtrimi i detyrës” për znj. Balluku. Paralelisht, ai kërkon që efektet e vendimit të GJKKO-së të pezullohen menjëherë, derisa çështja të shqyrtohet në themel nga Gjykata Kushtetuese. Së treti, kërkon edhe interpretimin e nenit 103/3 të Kushtetutës.
Kryeministri ngre disa argumenta bazë për pretendimet e veta. Ai thotë se vendimi i GJKKO-së ka ndërhyrë në kompetencat e tij, pasi Kryeministri është ai që propozon emërimin e një ministri. Ai pranon që caktimi i ministrit, në fakt, është pjesërisht kompetencë e tij (sepse ai vetëm propozon, ndërsa emërimin e bën Presidenti dhe votëbesimin e jep Kuvendi) dhe për këtë arsye ka thirrur në gjykim edhe Presidentin edhe Kuvendin.
Ai ngre edhe një argument tjetër, sipas të cilit, nëse një ministër pezullohet nga detyra me vendim gjykate, atëherë veprimtaria e Këshillit të Ministrave pengohet, sepse mungesa e ministrit paralizon të gjithë veprimtarinë e ministrisë përkatëse e për pasojë edhe të Këshillit të Ministrave i marrë në tërësi.
Gjithashtu ngre argumentin se figura e një ministri barazohet, sipas Kushtetutës, me figurën e deputetit. Ai pranon se Kodi i Procedurës Penale është i qartë, duke parashikuar pezullimin për çdo funksionar shteti, përveç atyre të zgjedhur sipas ligjit zgjedhor (deputet, kryetar bashkie dhe këshilltar bashkiak). Por, duke qenë se deputeti gëzon imunitet, atëherë — sipas Kryeministrit — edhe ministri duhet të gëzojë të njëjtat garanci. E përderisa deputeti nuk pezullohet, atëherë as ministri nuk duhet të pezullohet nga detyra. Për këtë qëllim, ai kërkon interpretim të pikës 3 të nenit 103 të Kushtetutës.
Sipas argumentimit të Këshillit të Ministrave, Gjykata Kushtetuese — në zbatim të ligjit organik dhe kompetencave kushtetuese — ka të drejtë të urdhërojë pezullimin e vendimit të GJKKO-së, pasi ky vendim prek interesa të larta shtetërore, shoqërore dhe individuale.
Në kërkesë thuhet se caktimi i një mase të përkohshme, derisa vendimi përfundimtar i Gjykatës Kushtetuese të hyjë në fuqi, është i domosdoshëm për mbrojtjen e sistemit të qeverisjes në Republikën e Shqipërisë dhe për ruajtjen e funksionalitetit të pushtetit ekzekutiv, konkretisht të Këshillit të Ministrave.
Sipas arsyetimit, interesi më i lartë shtetëror dhe shoqëror kërkon që kompetencat dhe përgjegjësitë e Këshillit të Ministrave të ushtrohen plotësisht nga të gjithë anëtarët e tij.
Këshilli i Ministrave paralajmëron se lënia në fuqi e vendimit të GJKKO-së — pa pezullim — do të sillte pasoja të pariparueshme në qeverisjen e vendit, duke krijuar vakuum institucional, mosfunksionim të Këshillit të Ministrave dhe pamundësi për ushtrimin e kompetencave që Kushtetuta dhe legjislacioni në fuqi ia njeh ekskluzivisht pushtetit ekzekutiv.
Në kërkesë theksohet se lënia në fuqi e vendimit, pa pezullim, do të thellonte konfliktin e kompetencave ndërmjet pushtetit gjyqësor dhe atij legjislativ e ekzekutiv, duke cenuar më tej parimin e ndarjes dhe balancimit të pushteteve.
“Këshilli i Ministrave parashtron se pezullimi i një ministri apo zv.kryeministri, përveç se shkakton mosfunksionalizim të Këshillit të Ministrave si organ kolegjial i pushtetit ekzekutiv, njëkohësisht pezullon veprimtarinë e pushtetit ekzekutiv në fushën e përgjegjësisë së ministrit apo zv.kryeministrit të pezulluar”, thuhet në kërkesë.
Më tej argumentohet se pezullimi sjell pasoja të rënda për interesin shtetëror dhe shoqëror, duke krijuar vakuum institucional, pasi pamundëson propozimin e projektakteve me rëndësi kombëtare për procesin e integrimit në Bashkimin Evropian — rreth 800 projektakte për t’u miratuar deri në fund të vitit 2027 nga ministria e cila drejtohet nga ministri i pezulluar përmes vendimit të GJKKO-së.
