Prokuroria e Posaçme ka urdhëruar sekuestrimin e dokumentave të kompanisë “Hill International NV”, e cila ka supervizuar ndërtimin e tunellit të Llogarasë.
Urdhri për sekuestrimin e dokumentave, u firmos nga prokurori Dritan Prençi dhe u zbatua nga një hetues i BKH-së.
Marrja dhe kqyrja e dokumentave pranë kompanisë “Hill International NV”, degë e një kompanie të huaj, doli si nevojë e hetimit që SPAK po kryen ndaj ish-kreut të ARRSH-së, Evis Berberi dhe biznesmenit Valter Begaj, administrator i kompanisë Net Group.
Sipas dokumentave rezulton se bashkimi i operatorëve ekonomikë, kompanisë “Hill International NV” dhe Net Group e Valter Begaj kanë fituar tenderin pranë Ministrisë së Infrastrukturës dhe Energjisë për mbikqyrjen e punimeve për tunelin e Llogarasë. SPAK po heton nëse ky tender është paracaktuar, për shkak se Evis Berberi dyshohet se favorizonte kompaninë e ish-ortakut të tij, Valter Begaj.
Sa i përket ndërtimit të Tunelit të Llogarasë, ish-zv.kryeministri në arrati Arben Ahmetaj ka hedhur akuza të rënda duke folur për një aferë korruptive që implikon edhe kryeministrin e vendit Edi Rama.
