Këngëtarja shqiptare me famë botërore, Dua Lipa, dhe aktori britanik Callum Turner janë martuar në një ceremoni intime të zhvilluar në Londër, sipas raportimeve të mediave britanike dhe amerikane.
Ceremonia civile u mbajt në Old Marylebone Town Hall, një prej vendeve më të njohura për martesa në kryeqytetin britanik, në prani të familjarëve dhe miqve më të afërt të çiftit. Fotografitë e publikuara nga mediat tregojnë çiftin duke dalë nga ceremonia mes urimeve dhe konfetimeve të të ftuarve.
Për këtë ditë të veçantë, Dua Lipa kishte zgjedhur një veshje të bardhë elegante të krijuar nga Schiaparelli, të kompletuar me doreza dhe një kapele të bardhë me strehë të gjerë, ndërsa Callum Turner u shfaq me një kostum blu të errët.
Lajmi vjen rreth një vit pasi çifti konfirmoi publikisht fejesën e tyre. Romanca mes tyre u bë publike në fillim të vitit 2024, ndërsa në vitin 2025 Dua Lipa konfirmoi se ishte fejuar me aktorin britanik.
Sipas raportimeve, ceremonia në Londër pritet të pasohet nga festime më të mëdha në Siçili, Itali, ku çifti planifikon të mbledhë miq dhe figura të njohura të botës së artit dhe muzikës.
