A shkaktojnë tatuazhet kancer? Përgjigjja e shkurtër është: jo. Të paktën deri më sot, tatuazhet dhe bojërat e përdorura për to nuk konsiderohen kancerogjene nga International Agency for Research on Cancer. Por përgjigjja më e plotë është më e ndërlikuar: shkenca ende nuk ka arritur në një përfundim përfundimtar.
Herë pas here, studime të reja rikthejnë vëmendjen te lidhja e mundshme mes tatuazheve dhe tumoreve, duke ngritur hipoteza dhe të dhëna që sugjerojnë se mund të ekzistojë një rrezik i shtuar për disa lloje kanceri.
Një nga studimet më të fundit, i realizuar mbi binjakë danezë, analizoi lidhjen mes tatuazheve dhe zhvillimit të tumoreve. Sipas rezultateve, personat me tatuazhe kishin një rrezik 62% më të lartë për tumore të lëkurës, përveç karcinomës bazocelulare, forma më e zakonshme e kancerit të lëkurës. Kur krahasimi u kufizua te binjakët ku vetëm njëri kishte tatuazh, rreziku rezultoi rreth 33% më i lartë.
Studiuesit vunë re edhe një element tjetër: madhësia e tatuazhit. Tatuazhet më të mëdha se pëllëmba e dorës shoqëroheshin me gati trefishim të rrezikut për limfoma dhe më shumë se dyfishim të rrezikut për tumore të lëkurës.
Edhe më herët, një studim suedez mbi afro 12 mijë persona kishte sugjeruar se tatuazhet mund të rrisnin me rreth 20% rrezikun për disa lloje limfomash, pavarësisht madhësisë së tyre.
Megjithatë, jo të gjitha kërkimet arrijnë në të njëjtin përfundim. Një studim në shtetin amerikan të Utah zbuloi madje se personat me më shumë tatuazhe ose tatuazhe të mëdha kishin rrezik më të ulët për melanomë. Ndërkohë, një tjetër studim francez nuk gjeti lidhje mes tatuazheve dhe tumoreve të lëkurës.
Ekspertët theksojnë se këto rezultate kontradiktore tregojnë mbi të gjitha nevojën për më shumë kërkime. Shumë studime kanë kufizime, si numri jo shumë i madh i pjesëmarrësve apo mungesa e analizës së faktorëve të tjerë të rrezikut, si ekspozimi i tepërt në diell.
Sipas specialistëve, ekzistojnë disa mekanizma biologjikë që teorikisht mund të lidhin tatuazhet me tumoret. Procesi i tatuimit shkakton inflamacion në organizëm, ndërsa bojërat e injektuara mund të grumbullohen në nyjet limfatike dhe të ndikojnë në sistemin imunitar.
Për më tepër, disa substanca të gjetura në bojërat e tatuazheve — si hidrokarburet aromatike policiklike, aminat aromatike dhe disa metale — janë klasifikuar nga vetë International Agency for Research on Cancer si substanca potencialisht ose realisht kancerogjene.
Në pritje të studimeve të reja, International Agency for Research on Cancer këshillon që tatuazhet të bëhen vetëm në studio profesionale dhe me standarde të larta higjiene. Agjencia rekomandon gjithashtu që personat të informohen mbi bojërat që përdoren, ndërsa për gratë shtatzëna ose ato që ushqejnë fëmijët me gji sugjerohet të shmangin tatuazhet përkohësisht.
Sipas ekspertëve, aktualisht nuk ekziston një “bojë plotësisht e sigurt”, megjithëse bojërat e zeza konsiderohen potencialisht më pak problematike sesa ato me ngjyra.
