Shakira ka bërë një rrëfim shumë personal, duke folur për periudhën e vështirë që përjetoi pas ndarjes nga ish-futbollisti Gerard Pique.
Artistja kolumbiane tha se fundi i lidhjes së tyre nuk ishte thjesht një ndarje, por një goditje e fortë emocionale, të cilën e përshkroi si një nga momentet më të errëta të jetës së saj.
Shakira u shpreh se kishte ëndërruar një familje të qëndrueshme dhe mendonte se marrëdhënia me Pique do të zgjaste përgjithmonë, ndaj shpërbërja e familjes së tyre ishte shumë e vështirë për t’u pranuar. Në të njëjtën periudhë, ajo u përball edhe me probleme serioze shëndetësore të të atit, gjë që e rëndoi edhe më shumë gjendjen e saj emocionale.
Megjithatë, këngëtarja thekson se kjo periudhë e ka transformuar, duke e bërë më të fortë dhe më të vetëdijshme për veten. Sot, ajo thotë se prioritet i saj janë fëmijët dhe karriera muzikore, ndërsa nuk mendon për një lidhje të re.
Shakira dhe Pique i dhanë fund marrëdhënies së tyre në vitin 2022, pas më shumë se një dekade së bashku dhe me dy fëmijë, Milan dhe Sasha. Pas ndarjes, Pique vazhdoi jetën me një lidhje të re, ndërsa Shakira u fokusua te familja dhe muzika.
Artistja shtoi se pavarësisht gjithçkaje, ruan respekt për Pique si baba i fëmijëve të saj dhe si pjesë e rëndësishme e historisë së jetës së saj, duke e konsideruar këtë kapitull si një periudhë që e bëri më të fortë se kurrë.
