Filloi me zvarritje procesi në GJKKO për dosjen "Partizani". Në seancë mungonte ish-kryeministri Sali Berisha, i cili përfaqësohet me avokatët e tij. Berisha akuzohet për veprën penale të korrupsionit kryer në bashkëpunim. Të pranishëm ishin të pandehurit Jamarbër Malltezi dhe biznesmeni Xhimo Begeja, ndërsa të pandehurit Fatmir Bektashi e Andia Pustina përfaqësohen nga avokatët e tyre. Sipas gjykatës, fletëthirrjen për seancën e sotme për Berishën e ka nënshkruar Jamarbër Malltezi, si familjar i tij. Ndërkohë, Malltezi në seancë deklaroi se nuk e ka njoftuar Berishën për procesin. Prokurori i Posaçëm, Arben Karja, deklaroi se i pandehuri Sali Berisha nuk është njoftuar për seancën e sotme; po ashtu, shoqëria Homeplan sh.p.k. nuk ka avokat në sallë. Gjykata vendosi ta shtyjë: "Kjo seancë nuk mund të zhvillohet për shkak të mosmarrjes së dijenisë së të pandehurit Sali Berisha dhe gjendjes shëndetësore të të pandehurit Fatmir Bektashi", theksoi gjykata. Seanca e radhës u caktua të zhvillohet më datë 21 korrik.
