SPAK dyshon për pastrim parash nga Ilir Meta dhe Monika Kryemadhi përmes familjarëve të afërt
SPAK ngre dyshime të forta se Ilir Meta dhe Monika Kryemadhi kanë investuar para të pista duke blerë pasuri të paluajtshme përmes Fatime Kryemadhit, nënës së deputetes së PL-së. Sipas SPAK, nëna e Kryemadhit ka marrë dy kredi për të mbuluar origjinën e parave të përfituara nga korrupsioni.
“Me qëllim për të mos përdorur për blerjen e apartamenteve shuma parash me origjinë korruptive apo të pajustifikuara, ndërkohë që në këtë periudhë Ilir Meta akuzohet për një fakt korrupsioni në lidhje me shtetasin Kastriot Ismailaj, është përdorur si truk marrja fillimisht e dy kredive bankare. Më pas është bërë shlyerja e kredive nëpërmjet depozitimit cash pa burim të ligjshëm nga Fatime Kryemadhi ose me deklarimin e burimeve të paqena, siç është rasti i shumave të deklaruara si të përfituara nga Gentjan Sula (biznesmen), dhe është arritur të futet në sistemin bankar një shumë e pajustifikuar prej 846 mijë eurosh”, thekson SPAK.
Në dosje thuhet se “për këtë shumë parash, Fatime Kryemadhi nuk ka dhënë asnjë shpjegim të besueshëm, por thjesht është përpjekur t’i justifikojë ato me të ardhura nga huatë, pasqyruar kjo në deklaratat noteriale të paraqitura nga shtetas të ndryshëm, të cilët paraqiten si huadhënës, siç është rasti i Ema Cokut. Këto deklarata noteriale jo vetëm që janë përpiluar pas pyetjes së shtetases Fatime Kryemadhi, por në sistemin bankar nuk ka asnjë të dhënë për marrjen e shumave monetare dhe as për shlyerjen e tyre.
Fatime Kryemadhi nuk ka pasur mundësi për të krijuar të ardhura në shumën 300 mijë euro, para të cilat i ka përdorur për të likuiduar kredinë e marrë, të cilën e përdori për të financuar Monika Kryemadhin dhe Ilir Metën për blerjen e apartamentit të regjistruar si pronë e M.N. Në këtë mënyrë - argumenton SPAK - Fatime Kryemadhi rezulton se i ka marrë kreditë bankare me qëllim për të futur në sistemin bankar, nëpërmjet pagimit të kësteve të kredive, shuma monetare të cilat burojnë nga veprimtari korruptive. Pra, shumat e ligjshme të përfituara nga kreditë janë kthyer në bankë me para të paligjshme të përfituara nga veprimtari korruptive. Në këtë mënyrë, ajo (Fatime Kryemadhi) ka mbuluar natyrën e vërtetë të shumave monetare të siguruara në mënyrë të paligjshme”, argumentohet në dosje.
Madje, në një rast Fatime Kryemadhi ka deklaruar se pas vdekjes së të shoqit i janë mbledhur 100 milionë lekë, të cilat i ka përdorur për blerje apartamentesh. Ilir Meta, ish-presidenti, ndodhet nën masën e arrestit me burg, nën dyshimet për korrupsion, pastrim parash dhe fshehje pasurie. Për të njëjtat akuza dyshohet edhe ish-bashkëshortja e tij, Monika Kryemadhi. Ndaj saj është caktuar masa e sigurisë “detyrim për paraqitje”.
