Një ngjarje e rëndë është regjistruar në orët e para të mëngjesit të sotëm, ku një takim shoqëror mes disa të rinjve përfundoi me plagosjen me armë zjarri të një 17-vjeçari.
Sipas të dhënave hetimore, ngjarja ka nisur mbrëmjen e 23 majit, kur një grup të rinjsh, mes tyre Mateo Likaj (17 vjeç), Rigers Sylaj (19 vjeç), Adri Veshti (20 vjeç), Serxho Koci (20 vjeç), Kristel Koci (21 vjeç) dhe Erjon Halilaj (22 vjeç), janë takuar në lagje dhe më pas kanë vendosur të qëndrojnë në banesën e 19-vjeçarit Rigers Sylaj, pasi prindërit e tij nuk ndodheshin në shtëpi.
Më vonë, grupi është nisur drejt zonës së Astirit, ku në një market kanë blerë dy shishe pije alkoolike dhe janë kthyer sërish në banesë, ku kanë vijuar të qëndrojnë në oborr duke konsumuar alkool dhe duke kaluar kohë së bashku.
Rreth orës 01:00 të datës 24 maj, dy prej të rinjve janë larguar, ndërsa në banesë kanë mbetur katër persona, përfshirë viktimën.
Rreth orës 01:40, sipas hetimeve paraprake, 19-vjeçari Rigers Sylaj ka marrë një pistoletë që e mbante në dhomën e tij dhe ua ka treguar shokëve. Në momentin kur po e manipulonte armën, duke menduar se nuk kishte fishek në fole, ai ka shkrepur aksidentalisht, duke plagosur rëndë në kokë 17-vjeçarin Mateo Likaj.
Pas ngjarjes, i plagosuri është nxjerrë menjëherë jashtë banesës dhe është vendosur në rrugë, ndërsa është njoftuar policia. Dy nga të pranishmit kanë kontaktuar shërbimet e emergjencës, ndërsa një tjetër është afruar më pas në vendngjarje.
17-vjeçari ndodhet në gjendje shumë të rëndë shëndetësore në spital, nën kujdes intensiv mjekësor, ndërsa policia dhe prokuroria po vijojnë hetimet për zbardhjen e plotë të dinamikës së ngjarjes dhe përgjegjësive të secilit të përfshirë në incident.
