Një efektiv policie është pezulluar nga detyra pas ngjarjes tronditëse në Fier, ku tri vajza dhunuan në mënyrë barbare një 17-vjeçare.
Lajmi u bë me dije nga Skënder Hitaj, Drejtor i Përgjithshëm i Policisë, gjatë një konference për shtyp.
“Është një video e rëndë ku shihen disa të mitura duke kryer veprime të dhunshme. Janë kryer veprimet procedurale dhe më pas, gjatë veprimeve hetimore që janë zhvilluar në vazhdimësi bashkë me prokurorinë, ka vijuar ndjekja penale. Një prej vajzave ka pasur rast të përsëritur dhe është arrestuar. Për një punonjës policie kemi marrë masën e përjashtimit nga detyra, pasi kishte kryer veprime të pahijshme ndaj një kolegeje”, tha kryepolici.
Ai sqaroi se efektivi ka kryer veprime që cenojnë figurën dhe imazhin e policisë.
“Pezullimi i tij është urdhëruar për shkelje të standardit dhe cenim të rëndë të figurës së punonjësit të policisë në krye të detyrës, pasi ka hyrë në një marrëdhënie të panevojshme me një nga vajzat e përfshira në ngjarje”, theksoi më tej Hitaj.
Ngjarja e rëndë e Fierit tronditi opinionin publik pas publikimit të një videoje ku një 17-vjeçare u dhunua nga dy vajza 15-vjeçare dhe një 19-vjeçare, në shtëpinë e kësaj të fundit.
