Ministria e Shëndetësisë ka reaguar duke deklaruar se nuk ka asnjë ndërprerje të analizave laboratorike në spitalet rajonale dhe universitare në vend, duke përgënjeshtruar alarmet për mungesë shërbimi.
Sipas njoftimit zyrtar, shërbimi vijon normalisht, veçanërisht për rastet urgjente që kryhen në çdo kohë për pacientët në nevojë.
Por ironia qëndron te fakti se vetë ministrja e Shëndetësisë, Evis Sala, gjatë ditës pranoi se situata me analizat është në proces rishikimi.
“Aktualisht po vlerësojmë, kemi të gjithë të dhënat dhe mbi bazën e tyre po bëjmë planifikimin e mirë të shërbimit. Nuk duhet të mungojnë analizat dhe këtë po e adresojmë dhe do ta zgjidhim brenda këtij viti”, u shpreh ministrja.
Pra, sipas komunikimit zyrtar problemi nuk ekziston, ndërsa sipas deklaratës së ministres po punohet që të zgjidhet brenda vitit. Një situatë ku përgënjeshtrimi duket se vjen… nga vetë ministrja.
