Kreu i Grupit Parlamentar të Partisë Demokratike, Gazment Bardhi, ka dërguar një letër kryetares së Kuvendit, Elisa Spiropali, në lidhje me dënimin e deputetit demokrat, Ervin Salianji, nga Gjykata e Apelit.
Bardhi shprehet se Prokuroria po vepron me ngut, duke theksuar se ajo nuk ka marrë autorizimin e Kuvendit për arrestimin e një ligjvënësi. Kjo situatë ngren shqetësime mbi procedurat ligjore dhe respektimin e të drejtave të deputetëve në Shqipëri.
Letra dërguar Spiropalit
Znj. Kryetare e Kuvendit,
Po në një procedurë ekstra ligjore, pa autorizim të Kuvendit, me një nxitim të pa shpjegueshëm, Prokuroria po ndjek procedurën për arrestimin e deputetit të opozitës. Sipas nenit 73, pika 2, “Deputeti nuk mund të arrestohet ose t’i hiqet liria në cfarëdo llojë forme, apo ndaj tij të ushtrohet kontroll personal ose i banesës, pa AUTORIZIMIN e Kuvendit”. Këto veprime të organeve të drejtësisë, që cënojnë parimet bazë të shtetit të së drejtës, kanë krijuar një situatë alarmante të goditjes politike ndaj opozitës. Dënimi pa ligj e prova i deputetëve të opozitës, duke shpërfillur autoritetin e Kuvendit të Shqipërisë, duke shkelur në mënyrë flagrante Kushtetutën e Republikës së Shqipërisë, duke mos arsyetuar masat represive ndaj deputetëve të opozitës, është akt i paprecedentë në një shtet demokratik.
Për këtë arsye, në përputhje me nenin 73, pika 2 e Kushtetutës, dhe nenit 13 të Rregullores, kërkojmë mbledhjen urgjente të Këshillit për Rregulloren, Mandatet dhe Imunitetin, për të rivendosur autoritetin e Kuvendit të Shqipërisë, frenimin e akteve politike ndaj deputetëve të Kuvendit të Shqipërisë, dhe rikthimin e kushtetutshmërisë.
