Ministrja e Ekonomisë dhe Inovacionit, Delina Ibrahimaj, duket se ka arritur atë që për qytetarët e zakonshëm është e pamundur: të jetë në dy vende njëherësh.
Në një anë, kryeministri Edi Rama e transmeton “live” në Facebook duke mbajtur fjalën në aktivitetin “Dyfisho Sipërmarrjen Tënde”. Në anën tjetër, në të njëjtën kohë, ministrja shfaqet në transmetimin “live” të Kuvendit, duke raportuar në Komisionin e Ligjeve, mbledhje e drejtuar nga Ulsi Manja.
Nëse të dy transmetimet kanë qenë vërtet të drejtpërdrejta, atëherë Delina Ibrahimaj jo vetëm që ka sfiduar ligjet e fizikës, por ndoshta meriton edhe dy rroga, pasi rezulton të ketë qenë në punë në dy vende njëkohësisht.
Sigurisht, shpjegimi më i mundshëm është që njëri prej transmetimeve të mos ketë qenë realisht “live”, por deri tani nuk ka asnjë sqarim zyrtar për këtë mospërputhje.
Deri atëherë, mbetet pyetja: ku ishte në të vërtetë ministrja Delina Ibrahimaj dhe cili prej dy transmetimeve nuk ishte “live”?
