Revista e njohur “Vogue” ka publikuar pamjet ekskluzive nga ceremonia madhështore e martesës mes Huma Abedin dhe Alex Soros, e cila u zhvillua këtë fundjavë në rezidencën e tyre në Water Mill, një zonë elitare në Hamptons, New York.
Huma Abedin, ish-këshilltarja e ngushtë e Hillary Clinton dhe një prej figurave më të njohura të politikës amerikane, kurorëzoi dashurinë me Alex Soros, djali i filantropit miliarder George Soros, në një ceremoni që kombinoi ritet myslimane dhe hebraike – në respekt të trashëgimisë kulturore të secilit prej tyre.
Dasma u zhvillua në prani të një liste të përzgjedhur të ftuarish, ku spikatnin emra të mëdhenj të politikës dhe artit ndërkombëtar. Të pranishëm ishin Hillary dhe Bill Clinton, nënpresidentja e SHBA Kamala Harris, kryetarja e Dhomës së Përfaqësuesve Nancy Pelosi, drejtoresha legjendare e “Vogue” Anna Wintour dhe figura të tjera të njohura.
Në mesin e të ftuarve ishte edhe kryeministri i Shqipërisë, Edi Rama, i cili tërhoqi vëmendjen me stilin e tij të veçantë. Ai u shfaq me një kostum në ngjyrë pana, këmishë të bardhë dhe papion në ngjyrë “burgundy”. Edhe pse vetë nuk publikoi asnjë imazh në rrjetet sociale, prania e tij u kap nga objektivi i aparatit të revistës “Vogue”, që dokumentoi me detaje atmosferën festive të ceremonisë.
Huma Abedin veshi dy fustane të personalizuara – një i krijuar nga shtëpia e modës Givenchy dhe tjetri nga Erdem – që reflektuan hijeshi, elegancë dhe finesë të lartë.
Në vend të dhuratave tradicionale, çifti Soros-Abedin u kërkoi të ftuarve të kontribuonin për kauza bamirësie, duke e kthyer kështu ditën e tyre të veçantë në një festë jo vetëm të dashurisë, por edhe të solidaritetit dhe angazhimit shoqëror.
Ceremonia u përshkua nga një atmosferë intime, por me një përmasë globale, ku u përzien tradita, luks, dashuri dhe ndikim ndërkombëtar.
