Në procesin gjyqësor ndaj të pandehurve për aferën e koncesionit të sterilizimit, njëri prej zyrtarëve të akuzuarit çuditi trupën gjykuese teksa bëri mbrojtjen e tij dhe kundërshtoi akuzat.
Saimir Kadiu, ish-drejtor ekonomik në Ministrinë e Shëndetësisë kërkoi nga gjykata pafajësinë. Ai deklaroi në seancë se nuk ka shpërdoruar detyrën sikurse pretendon SPAK.
Ndërsa zgjodhi ta provonte pafajësinë e tij duke i treguar trupës gjykuese një anekdotë.
“Lexova një anekdotë para ca ditësh. Mori flakë pylli dhe të mblodhën gjitha kafshët e thanë: po na dënon zoti se kemi bërë shumë mëkate. Luani tha për shembull, unë kam ngrënë shumë prej jush. Ujku e dhelpra po ashtu. Pastaj i erdhi radha gomarit dhe ai tha që pashë një lëndinë me bar të gjelbërt dhe vajta e hëngra. Të gjitha kafshët thanë: ky është gabimi më i rëndë dhe dënuan gomarin”. Kur gjykata e pyeti përse e tregoi këtë anekdotë, i pandehuri u përgjigj: “kërkoj mos jem unë gomari”.
Tri javë më parë SPAK lexoi pretencën për të pandehurit e aferës së koncesionit të Sterilizimit. Për ish-zëvendësministrin e Shëndetësisë, Klodian Rjepaj dhe biznesmenin Ilir Rrapaj që zotëron pjesën e “luanit” në kontratën koncesionare u kërkua dënimi me 10 vite burgim. Për shkak të gjykimit të shkurtuar dënimi për ta reduktohet në 6 vite e tetë muaj.
Ndaj Rjepajt rëndojnë akuzat për “vjedhje duke shpërdoruar detyrën”, kryer në bashkëpunim, “grup i strukturuar kriminal” dhe “falsifikim dokumentash”.
Ndërsa, mbi Rrapajn rëndojnë akuzat “vjedhje me pasoja të rënda”, kryer në bashkëpunim dhe grup të strukturuar kriminal. Dënime të lehta apo me shërbim prove u kërkuan dhe për të pandehurit e tjerë, përfshirë dhe ish-rektorin e Universitetit të Mjekësisë, Arben Gjata.
Ndërkohë ish-ministri i Shëndetësisë, Ilir Beqaj po gjykohet në një proces të zakonshëm për akuzat e “vjedhjes duke shpërdoruar detyrën” dhe “grupit të strukturuar kriminal”. Të pandehurit janë duke paraqitur argumentat e tyre të mbrojtjes dhe më pas gjykata pritet të shpallë verdiktin.
