Gjykata e Posaçme e Apelit kthen për rigjykim dosjen penale ndaj ish-deputetit socialist Alqi Bllako. Ai akuzohet për korrupsion lidhur me aferën e inceneratorit të Tiranës. Bllako u dënua me 4 vite burg nga GJKKO, por për shkak të gjykimit të shkurtuar iu reduktua në 2 vite e tetë muaj.
SPAK thotë se Bllako ka përfituar në mënyrë të tërthortë shumën prej 119,715 eurosh nga Klodian Zoto dhe Mirel Mërtiri, pronarët de fakto të inceneratorit të Tiranës, për blerjen e një pajisjeje për aktivitetin tregtar të babait të tij në Ersekë.
Ndërsa u ka propozuar Vladimir Bezhanit të vazhdonte detyrën si këshilltar i jashtëm i ministrit të Mjedisit, Lefter Koka, kur lindi ideja për dhënien e koncesionit.
Për Bezhanin, ai akuzohet se i ka kërkuar aksionerit të shoqërisë propozuese “Integrated Technology Services” sh.p.k, Klodian Zoto, njëkohësisht aksioner i shoqërisë koncesionare “Integrated Energy BV SPV” sh.p.k, që të jepte përfitimin e parregullt, duke e punësuar fiktivisht, prej nga ka siguruar një përfitim në vlerën 7.5 milionë lekësh.
Më poshtë njoftimi.
Gjykata e Posaçme e Apelit për Korrupsionin dhe Krimin e Organizuar, me trup gjykues të përbërë nga gjyqtarët Saida Dollani (kryesuese), Miliana Muça (anëtare) dhe Tereza Merkaj (anëtare), më datë 23.07.2025, shpalli vendimin lidhur me çështjen e regjistruar me nr. 50 akti, datë 17.06.2025 regjistrimi, mbi ankimin e paraqitur ngaProkuroria e Posaçme kundër Korrupsionit dhe Krimit të Organizuar dhe ankimin e paraqitur nga i pandehuri A.B.,ndaj vendimit nr. 22, datë 11.03.2025 të Gjykatës së Posaçme të Shkallës së Parë për Korrupsionin dhe Krimin e Organizuar, dhe vendosi:
Prishjen e vendimit nr. 22, datë 11.03.2025 të Gjykatës së Posaçme të Shkallës së Parë për Korrupsionin dhe Krimin e Organizuar, duke u urdhëruar dërgimi i akteve për gjykim një kolegji tjetër të së njëjtës gjykatë.
U shpall në Tiranë, më 23.07.2025.
