Në Katedralen "Ngjallja e Krishtit" në Tiranë, po zhvillohet ceremonia për fronëzimin e Kryepeshkopit të ri të Shqipërisë, Imzot Joan Pelushi. Kjo ngjarje e rëndësishme për Kishën Ortodokse Autoqefale të Shqipërisë shënon një moment të veçantë, pasi është hera e parë që një kryepeshkop shqiptar merr përgjegjësinë e fronit më të lartë kishtar.
Ceremonia po ndiqet nga qindra besimtarë, si dhe nga përfaqësues të lartë të shtetit shqiptar dhe atij grek, së bashku me delegacione nga 13 Kishat Ortodokse të botës. Pjesëmarrës në këtë ngjarje janë Presidenti i Republikës, Bajram Begaj, kryeparlamentarja Elisa Spiropali, kreu i opozitës Sali Berisha, ish-Presidentët Alfred Moisiu dhe Bamir Topi, si dhe ministri i mbrojtjes nga Greqia.
Fjalimi kryesor i ceremonisë është ai i Kryepeshkopit Joan, i cili do të ulët për herë të parë në fronin e Kryepeshkopatës, një detyrë që ai do ta mbajë për gjithë jetën. Nesër, ai do të udhëhojë shërbesën e tij të parë si kreu i Kishës Ortodokse Autoqefale të Shqipërisë, ndërkohë që pritet të emërojë pasardhësin e tij në Mitropolinë e Korçës, ku ka shërbyer që prej vitit 1998.
Imzot Joan pason në këtë detyrë Hirësinë e tij Anastas, i cili u nda nga jeta në janar të këtij viti, në moshën 95 vjeçare. Zgjedhja e një kryepeshkopi shqiptar për Kishën Ortodokse Autoqefale të Shqipërisë ishte një nga dëshirat e fundit të Kryepeshkopit të ndjerë Anastas.
