Një tarifë prej vetëm 50 centësh për përdorimin e një tualeti publik ka përfunduar në një çështje ligjore kundër qytetit të Vjenës, pasi një 27-vjeçare pretendon se sistemi diskriminon gratë.
Melanie Gradik ka paraqitur një ankesë zyrtare ligjore kundër kryeqytetit austriak, pasi gjatë një vizite në një park konstatoi se miku që e shoqëronte mund të përdorte falas një urinar publik, ndërsa asaj iu kërkua të paguante 0.50 euro për të hyrë në një kabinë të mbyllur.
Sipas Gradik, pikërisht këtu qëndron diskriminimi: megjithëse tarifa teknikisht aplikohet për të gjithë ata që përdorin kabinat, në praktikë gratë pothuajse gjithmonë kanë nevojë për një të tillë, ndërsa burrat kanë alternativën e urinareve falas.
“Unë isha në një park me një mik dhe të dy kishim nevojë të përdornim tualetin. Ai mund të shkonte falas, ndërsa unë duhej të paguaja 50 cent. Mendova: ‘Si është e mundur kjo?’”, është shprehur 27-vjeçarja.
Ajo e konsideron tarifën një shembull të qartë të pabarazisë me të cilën përballen gratë në jetën e përditshme dhe argumenton se sistemi mund të jetë në kundërshtim me legjislacionin kundër diskriminimit.
Autoritetet e Vjenës, nga ana tjetër, e kanë mbrojtur sistemin. Zëdhënësja e bashkisë, Sandra Holzinger, ka argumentuar se në zonat me frekuentim të lartë tarifat janë të nevojshme për të garantuar mbikëqyrjen, përdorimin korrekt dhe pastërtinë e tualeteve.
Sipas saj, tarifa prej 50 centësh paguhet nga personat e çdo gjinie që përdorin kabinat, ndërsa urinarët falas janë vendosur për të parandaluar urinimin në hapësirat publike.
Por Gradik këmbëngul se rezultati praktik mbetet i pabarabartë.
“Dua që të gjithë të mund ta përdorin tualetin në kushte të barabarta. Ose paguajmë të gjithë 50 cent, ose nuk paguan askush”, është shprehur ajo.
Tashmë çështja do të duhet të përcaktojë nëse një tarifë formalisht e njëjtë për përdorimin e kabinave mund të konsiderohet diskriminuese kur, në praktikë, njëra gjini ka në dispozicion një alternativë falas.
