Në disa zona të Indonezisë lindore, shtëpia nuk konsiderohet më vendi më i sigurt për të kaluar natën.
Pas tërmetit me magnitudë 7.7, rreth 5 mijë njerëz janë evakuuar, ndërsa mijëra të tjerë po qëndrojnë në stadiume, tenda dhe hapësira të hapura nga frika se ndërtesat e dëmtuara mund të shemben gjatë pasgoditjeve.
Në rajonin Sikka, një prej zonave më të goditura, mbi 3,300 persona janë larguar vetë nga banesat ose janë strehuar në një arenë sportive.
Të tjerë qëndrojnë pranë shtëpive të shembura nën tenda të improvizuara me mushama plastike. Në spitale, disa pacientë po trajtohen në tenda jashtë ndërtesave.
Arsyeja e frikës është e kuptueshme. Që prej tërmetit kryesor janë regjistruar afro 1,000 pasgoditje.
Në Maumere, banorët e intervistuar pranë një porti të mbyllur, ku çatia dhe muret janë shembur, thanë se kishin frikë të ktheheshin në ndërtesa.
Ndërkohë mbi 3,500 pjesëtarë të ushtrisë dhe policisë janë angazhuar në zonat e prekura, ndërsa rrëshqitjet e dheut dhe rrugët e bllokuara vazhdojnë të pengojnë shpëtuesit.
