Për vite me radhë, mjekët dhe dietologët kanë përsëritur të njëjtën këshillë: kilogramët duhen humbur ngadalë, në mënyrë graduale dhe të qëndrueshme, për të shmangur rikthimin e tyre. Por një studim i ri norvegjez, i prezantuar në Kongresin Europian për Obezitetin (ECO) në Stamboll, po sfidon pikërisht këtë bindje të rrënjosur prej dekadash.
Sipas studiuesve, humbja e shpejtë e peshës jo vetëm që sjell rezultate më të mira në një kohë më të shkurtër, por duket se ndihmon edhe në ruajtjen e tyre në afat më të gjatë.
Kërkimi është realizuar nga Line Kristin Johnson dhe ekipi i Departamentit të Endokrinologjisë, Obezitetit dhe Ushqyerjes në Vestfold Hospital Trust në Tønsberg të Norvegjisë. Autorët argumentojnë se ideja se “dobësimi i ngadaltë është më i mirë” është mbështetur kryesisht në studime të kufizuara ose vëzhguese, ndërsa provat klinike të randomizuara kanë qenë të pakta.
Studimi u mbështet edhe në rezultatet e një kërkimi italian të publikuar në vitin 2025, sipas të cilit arritja e një BMI-je nën 27 dhe një raporti bel-lartësi nën 0.53 redukton ndjeshëm rrezikun 10-vjeçar për diabet të tipit 2, hipertension dhe sëmundje kardiovaskulare.
Për të kuptuar se cila metodë funksionon më mirë, studiuesit ndoqën për 52 javë 284 të rritur me obezitet dhe BMI mbi 30. Pjesëmarrësit u ndanë në dy grupe.
Grupi i parë ndoqi një regjim më agresiv: më pak se 1000 kalori në ditë gjatë javëve të para, me rritje graduale të kalorive deri në fund të programit 16-javor. Grupi i dytë ndoqi një metodë më tradicionale dhe më të moderuar, me një deficit kalorik më të ulët.
Pas katër muajsh, rezultatet ishin të qarta. Grupi me dobësim të shpejtë humbi mesatarisht 12.9% të peshës trupore, ndërsa grupi gradual vetëm 8.1%.
Por ajo që befasoi studiuesit ishte fakti se diferenca mbeti e dukshme edhe pas një viti. Pjesëmarrësit që kishin humbur peshë shpejt ruajtën rezultate më të mira: 14.4% humbje peshe kundrejt 10.5% në grupin gradual.
Edhe treguesit klinikë rezultuan më pozitivë. Gati një e treta e pjesëmarrësve në grupin e parë arritën BMI nën 27 pas një viti, krahasuar me më pak se 10% në grupin e dytë.
Pas fazës fillestare, të dy grupet ndoqën të njëjtin program për ruajtjen e peshës, me konsultime dhe mbështetje profesionale. Dieta e përdorur bazohej në ushqim të zakonshëm dhe rekomandime të shëndetshme ushqimore: perime, fruta, drithëra integrale, peshk, mish pa yndyrë dhe reduktim të sheqernave e yndyrnave të ngopura.
Autorët theksojnë se humbja e shpejtë e peshës duhet të realizohet në kushte të kontrolluara dhe nën mbikëqyrje profesionale, por sipas tyre rezultatet sfidojnë qartë bindjen tradicionale se dietat e ngadalta janë domosdoshmërisht më të qëndrueshme.
“Rezultatet tona tregojnë se humbja e shpejtë e peshës nuk lidhet me rikthim më të madh të kilogramëve dhe, përkundrazi, ndihmon më shumë njerëz të arrijnë objektiva të rëndësishëm klinikë për reduktimin e rrezikut nga diabeti, hipertensioni dhe sëmundjet kardiovaskulare”, deklaroi Johnson gjatë prezantimit të studimit.
