Një skandal tronditës ka shpërthyer në Itali pasi një shofer ambulance i Kryqit të Kuq, 27-vjeçari Luca Spada, është arrestuar me akuzën e vrasjes së qëllimshme dhe të paramenduar të gjashtë të moshuarve gjatë transportit të tyre me ambulancë në zonën e Forlit gjatë vitit 2025.
Sipas hetimeve, Spada është përgjuar nga autoritetet ndërsa fliste në telefon me të dashurën dhe me pronarët e një agjencie funerale. Në bisedat e regjistruara ai shprehej pa pendesë për viktimat.
“Ata pleq po vuanin shumë, është e drejtë të shkojnë para Zotit”, dëgjohet të thotë ai në një nga përgjimet. Në një tjetër moment shton: “Më pëlqeu, do ta bëj përsëri.”
Spada u arrestua nga karabinierët në Forli dhe nga njësia speciale e shëndetësisë (NAS) në shtëpinë ku jetonte me të dashurën dhe djalin e tyre pak më shumë se një vjeç.
Hetimi mori kthesë pas autopsisë së Deanna Mambelli, 85 vjeçe, e cila u ndje keq gjatë transportit dhe vdiq më 25 nëntor. Ekspertiza mjeko-ligjore tregoi se vdekja ishte shkaktuar nga një injeksion ajri në venë, që provokon emboli gazi.
Më 18 mars ekspertët e RIS analizuan gjilpëra, shiringa dhe kateterë të gjetur në ambulancë për të kërkuar gjurmë të ADN-së së Spadës. Hetuesit po përpiqen të kuptojnë edhe motivin e krimeve: nëse ai e konsideronte veten si një lloj “engjëlli të vdekjes” që i jepte fund vuajtjeve të pacientëve, apo nëse bëhet fjalë për një akt të pastër mizorie.
Në qytetin e vogël të Meldolës, ku jetonte, banorët janë në shok. Disa thonë se Spada kishte një interes të pazakontë për trupat e pajetë dhe kishte bashkëpunuar herë pas here me një agjenci funerale, duke ndihmuar në përgatitjen e trupave për varrim.
