Ndërsa në Pakistan zëvendëspresidenti JD Vance njoftonte se negociatat me Iranin kishin dështuar, presidenti amerikan Donald Trump ndodhej në Miami duke ndjekur një ndeshje të UFC (arte marciale të përziera).
Trump kaloi disa orë në tribunën pranë kafazit të luftës, i rrethuar nga sekretari i Shtetit Marco Rubio, disa nga fëmijët e tij, zyrtarë të UFC-së dhe figura të njohura publike. Sipas raportimit të New York Times, presidenti dukej kryesisht i qetë, duke ndjekur ndeshjet ndërsa bashkëpunëtorët i jepnin herë pas here përditësime mbi situatën.
Nuk është e qartë nëse Trump ishte informuar për dështimin e negociatave në momentin kur hyri në arenë. Ai nuk përdorte telefonin gjatë eventit, ndërsa në një moment Rubio iu afrua për t’i treguar diçka në ekranin e tij.
Më herët, gjatë udhëtimit drejt Floridës, Trump u kishte thënë gazetarëve se nuk kishte rëndësi nëse arrihej apo jo një marrëveshje me Iranin.
“Ne fitojmë, pavarësisht rezultatit”, tha ai. “I kemi mposhtur ushtarakisht.”
Ndërkohë, në Uashington situata politike për presidentin mbetet e tensionuar. Demokratët dhe disa kritikë të tij kanë reaguar ashpër ndaj deklaratave të fundit të Trump për Iranin, duke kërkuar madje edhe nisjen e një procesi për shkarkimin e tij dhe një ekzaminim të plotë mendor.
Ndërsa këto debate po zhvillohen në kryeqytet, Trump kaloi mbrëmjen në Miami, ku u prit me ovacione nga publiku në arenën e UFC-së. Në të njëjtën kohë, në Pakistan, JD Vance u largua nga bisedimet pa marrëveshje, ndërsa mbetet e paqartë nëse armëpushimi i brishtë me Teheranin do të zgjasë.
