Irani ka konfirmuar zgjatjen e armëpushimit me Shtetet e Bashkuara të Amerikës, duke lënë të hapur mundësinë e zhvillimeve diplomatike në të ardhmen, por pa u angazhuar për një rifillim të menjëhershëm të negociatave.
Zëdhënësi i Ministrisë së Jashtme iraniane, Esmail Baghai, në deklarata të transmetuara nga televizioni shtetëror, nuk dha një qëndrim të qartë nëse Teherani është i gatshëm të marrë pjesë në një raund të ri bisedimesh me Uashingtonin në Islamabad.
Sipas tij, diplomacia mbetet një instrument për mbrojtjen e interesave dhe sigurisë kombëtare, duke theksuar se vendimet për përdorimin e saj do të varen nga ekzistenca e kushteve të përshtatshme.
Ky qëndrim shihet si një sinjal se Teherani po mban të hapura kanalet e komunikimit, por pa konfirmuar nisjen e menjëhershme të negociatave.
Nga ana tjetër, diplomatë iranianë kanë deklaruar se nuk do të ketë rikthim në bisedime pa heqjen e “bllokadës amerikane ndaj porteve iraniane”, duke shtuar se “nuk do të negociohet nën kërcënime”.
Sipas tyre, komunikimi me ndërmjetës pakistanezë po vijon, me synimin për të krijuar kushtet e nevojshme për rifillimin e mundshëm të negociatave në të ardhmen.
