Një paralajmërim për cunami deri në tre metra është lëshuar në Japoni pasi një tërmet i fortë me magnitudë 7.4 goditi në det pranë bregut verilindor të vendit, sipas Agjencisë Meteorologjike të Japonisë dhe Shërbimit Gjeologjik të SHBA-së.
Agjencia Meteorologjike japoneze ka shpallur alarm për cunami deri në tre metra për prefekturën Iwate dhe për disa zona të Hokkaidos dhe Aomorit. Për pjesë të tjera të Japonisë verilindore është lëshuar një paralajmërim më i ulët, me vlerësimin se dallgët mund të arrijnë deri në një metër.
Sistemi Amerikan i Paralajmërimit për Cunamët njoftoi se tërmeti në brigjet lindore të ishullit Honshu kishte magnitudë 7.4 dhe se rreziku për cunami u shpall në orën 08:52 UTC (04:52 me orën lindore të SHBA-së). Ndërkohë, agjencia kombëtare japoneze e rishikoi magnitudën në 7.5, megjithëse nuk është e qartë arsyeja e këtij dallimi në shifra.
Producenti i CNN në Tokio raportoi se ndërtesa ku ndodhej u lëkund për rreth shtatë minuta.
“Banorët në zonat ku është shpallur paralajmërimi për cunami duhet të evakuohen menjëherë drejt zonave më të larta ose drejt vendeve të sigurta, si ndërtesat e posaçme për evakuim”, deklaroi kryeministrja japoneze Sanae Takaichi për gazetarët të hënën, sipas transmetuesit kombëtar NHK.
Autoritetet, shtoi ajo, po bëjnë “çdo përpjekje për të vlerësuar dëmet, për të zbatuar masat emergjente të reagimit ndaj fatkeqësisë, përfshirë operacionet e kërkim-shpëtimit, dhe për t’i dhënë publikut informacion të saktë dhe në kohë”.
“Në këtë moment ende po konfirmojmë shkallën e dëmeve njerëzore dhe materiale, por pritet të marrim raporte më të detajuara së shpejti dhe të vazhdojmë me përpjekjet për menaxhimin e katastrofës”, tha ajo.
