Ministri i Punëve të Brendshme të Kosovës, Xhelal Sveçla, ka reaguar në lidhje me bllokadën e re që kanë bërë brenda territorit të Serbisë disa grupe ekstremistësh të maskuar. Në një reagim në facebook, Sveçla shkruan se në prani të policisë së Serbisë një familjeje e cila po udhëtonte drejt Gjermanisë, i është pamundësuar vazhdimi i udhëtimit dhe është kthyer prapa me forcë.
“Pas paralajmërimit të grupeve ekstremiste serbe për protesta sot pas orës 18:00, janë vërejtur grupe ekstremistësh të maskuar të cilët në prani të policisë së Serbisë, brenda territorit të Serbisë, kanë ndaluar veturat dhe legjitimuar udhëtarët. Para pak çastesh, një familjes e cila po udhëtonte për në Gjermani, i është pamundësuar vazhdimi i udhëtimit dhe është kthyer prapa me forcë. Kjo po ndodhë para syve të policisë së Serbisë, fakt ky që e bën atë bashkë fajtore. Këto akte fashiste ku serbët lejohen pavarësisht dokumentacioneve që posedojnë kurse shqiptarët pengohen pavarësisht dokumentacioneve që posedojnë, janë absolutisht të papranueshme për ne. Prandaj, deri në stabilizimin e qarkullimit normal, të pa pengueshëm dhe të sigurtë për të gjithë udhëtarët, pika kufitare në Bërnjak mbyllet për qarkullim”– ka shkruar Sveçla në Facebook.
Deri tani janë bllokuar pjesërisht 3 pika të kalimit kufitar. Grupe serbësh po qëndrojnë në pjesën serbe të kufirit duke mos lejuar të kalojnë makina me targa të Kosovës.
