"Las Vegasi është vendi ku martohesh, Reno është vendi ku divorcohesh," thotë një shprehje e njohur në shtetin e Nevadas në SHBA. Ligjet shtetërore që lejojnë disa çështje ligjore të përfundojnë më shpejt dhe në mënyrë më të fshehtë se në pjesë të tjera të vendit, kanë bërë që ky qytet relativisht i vogël të shërbejë si sfond i qetë për përplasjet dramatike familjare mbi një perandori globale mediatike.
Rupert Murdoch dhe familja e tij udhëtuan nga të gjitha anët e botës për të vendosur se si do të ndahet perandoria e tij mes fëmijëve të tij, kur patriarku 93-vjeçar të vdesë. Për gjashtë ditë, një karvan me shtatë makina të zeza SUV transportoi magnatin mediatik dhe familjen e tij drejt Gjykatës së Qarkut Washoe.
Beteja për pasardhësinë, e cila përfundoi të hënën, u mbajt në privatësi. Gjykata nuk ka dhënë asnjë informacion se kur do të merret një vendim. Kur ky vendim të dalë, nuk do të jetë i qasshëm për publikun.
Murdochi i moshuar zakonisht largohej nga gjykata pas drekës, ndërsa katër fëmijët e tij qëndronin brenda deri në mbrëmje, duke mos thënë asgjë teksa dilnin. Cilado qoftë rezultati i kësaj çështjeje, ai do të ketë pasoja të gjera që shkojnë përtej dramës familjare, duke formësuar rrugën e kompanisë më të fuqishme konservatore mediatike në botë.
News Corp zotëron qindra gazeta dhe media në mbarë botën. Perandoria përfshin Fox News në SHBA, një platformë e rëndësishme për Donald Trump gjatë fushatës për zgjedhjet e 2016-ës, si dhe gazeta me ndikim të gjerë si The Sun në Mbretërinë e Bashkuar.
