Kryetari i Partisë Demokratike, Sali Berisha, deklaroi pas seancës së tensionuar parlamentare se opozita nuk do të japë votën për asnjë marrëveshje që shqyrtohet me procedurë të përshpejtuar, duke iu referuar marrëveshjes së financimit me Shtetet e Bashkuara për modernizimin e Forcave të Armatosura.
“Nuk ka rëndësi nëse do të jemi apo jo në seancë, por nuk do të votojmë asnjë marrëveshje me procedurë të përshpejtuar”, u shpreh Berisha, duke kërkuar që marrëveshja të hidhet në votim të premten, pas një shqyrtimi normal parlamentar.
Nga ana tjetër, kreu i grupit parlamentar të Partisë Socialiste, Taulant Balla, e cilësoi marrëveshjen si historike dhe si një dëshmi të besimit të Shteteve të Bashkuara ndaj Shqipërisë.
Sipas Ballës, financimi do të përdoret ekskluzivisht për modernizimin e Forcave të Armatosura me pajisje dhe shërbime sipas standardeve të NATO-s. Ai sqaroi se Shqipëria do të ketë 48 muaj për të aktivizuar fondet dhe deri në 12 vjet për shlyerjen e tyre, ndërsa kredia parashikon edhe një periudhë “grace” deri në një vit, si dhe mundësinë e parapagimit pa penalitete.
Balla theksoi gjithashtu se çdo përdorim i fondeve do të miratohet nga Agjencia Amerikane e Mbrojtjes, çka sipas tij garanton transparencë të plotë në zbatimin e marrëveshjes.
