Kreu i grupit parlamentar të Partisë Demokratike, Gazment Bardhi, ka deklaruar se mazhoranca ka rrëzuar kërkesat e opozitës për zhvillimin e debateve në Kuvend lidhur me protestën dhe shqetësimet e qytetarëve.
Sipas Bardhit, PD nuk pretendon të përfaqësojë protestuesit, por synon të sjellë në vëmendje problemet dhe shqetësimet e qytetarëve që, sipas tij, duhet të diskutohen në parlament.
Ai u shpreh se Partia Demokratike ka ndjekur dhe vlerësuar shqetësimet e qytetarëve që protestojnë prej 26 ditësh në bulevard, duke theksuar se protesta të ngjashme kanë marrë vëmendje edhe në parlamente europiane, ndërsa Kuvendi i Shqipërisë, sipas tij, nuk i ka kushtuar vëmendje kësaj situate.
Bardhi tha gjithashtu se PD ka depozituar tre kërkesa: një interpelancë urgjente me kryeministrin, një mocion me debat për rolin e Kuvendit në adresimin e shqetësimeve të qytetarëve dhe një mocion tjetër për rezolutën e fundit të Parlamentit Evropian në kuadër të procesit të integrimit.
Ai shtoi se këto kërkesa janë refuzuar në Konferencën e Kryetarëve pa argumentim, duke u justifikuar me pretendimin se opozita po tenton të flasë në emër të protestuesve. Sipas tij, PD nuk e ka pasur këtë pretendim, por kërkon thjesht debat parlamentar për çështje që lidhen me qytetarët.
Bardhi theksoi se debate të tilla zhvillohen edhe në parlamente të tjera europiane, si në Parlamentin Evropian dhe Bundestagun gjerman, ndërsa Kuvendi i Shqipërisë, sipas tij, nuk po i trajton këto çështje me seriozitet.
Nga ana tjetër, kreu i grupit parlamentar të PS, Taulant Balla, deklaroi më herët se mazhoranca nuk e njeh PD-në dhe Sali Berishën si përfaqësues të protestuesve, duke shtuar se opozita ka ndryshuar përmbajtjen e kërkesave të tyre.
