Kryetari i grupit parlamentar të PD, Gazment Bardhi, dhe kryeministri Rama vazhdojnë të shkëmbejnë akuza lidhur me dënimin e deputetit Ervin Salianji. Pas Ramës, ka reaguar Bardhi:
"Olsi Rama është halli i Edi Ramës, jo drejtësia; njëlloj siç Geroni ishte halli i Fatmir Xhafajt, jo drejtësia! Fushata e egër e Edi Ramës për dënimin politik të Ervin Salianjit nga disa gjyqtarë të ndikuar, s'ka të bëjë me drejtësinë. Ai po bën ç’të mundet për të ndikuar në hetimin e vëllait të tij dhe për të penguar të vërtetën e përfshirjes së Olsi Ramës me trafikantët ndërkombëtarë të kokainës në Xibrakë.
Kjo fushatë e Ramës na kujton kohën kur ai mohoi kanabizimin e vendit, duke na quajtur shpifës që i nxinim imazhin vendit. Mbrojti Saimir Tahirin dhe ne ishim sërish shpifës, por më pas e vërteta doli në dritë. Mbrojti Elvis Roshin, Arben Ndokën, Armando Prengën, Valdrin Pjetrin, Agim Kajmakun dhe të ngjashmit e tyre, por ne që i akuzonim për përdhunime, vrasje dhe trafik droge dolëm të drejtë.
Edhe për inceneratorët, ku akuzat tona për korrupsion fillimisht u quajtën shpifje, sot një dyzinë zyrtarësh janë në burg. Ervin Salianji nuk e ka sajuar faktin që vëllai i ministrit të Edi Ramës ishte një trafikant i dënuar droge në Itali dhe qëndronte i qetë në Shqipëri, pa kryer dënimin, nën mbrojtjen e qeverisë së Ramës. A ka diçka për të thënë Edi Rama për këtë?
Salianji u bë zëri publik i një denoncimi të ardhur në Partinë Demokratike, ku thuhej se vëllai trafikant i ministrit vazhdonte aktivitetin e paligjshëm të trafikut të drogës. Cili institucion e hetoi këtë? Policia e Shtetit, e drejtuar nga ministri me vëllain trafikant? Pse nuk iu morën mostrat e zërit vëllait të ministrit, por u nis një paketë postale për të bërë burgun në Itali? Edi Rama ka diçka për të thënë për këtë?
Përpara se të na tregojë përrallat e tij me drejtësi të pavarur, Edi Rama duhet të shpjegojë çfarë bënte vëllai i tij me makinën që përdornin trafikantët e drogës në Xibrakë, kur po ngrihej laboratori i drogës dhe kishte nisur përpunimi i kokainës. A ka diçka për të thënë për këtë Edi Rama?"
Vlen të përmendet se Edi Rama ka zgjedhur të shkëmbejë mesazhe politike me Gazment Bardhin, duke anashkaluar kryetarin e PD-së. Kryeministri duket se "ka zgjedhur" kandidatin për kryeministër në opozitë, teksa ditët e fundit Bardhi është i vetmi me të cilin Rama shkëmben akuza në distancë.
