Këshilli i Sigurimit i OKB-së ka miratuar një rezolutë që i bën thirrje Hamasit të pajtohet me një propozim me tre faza për armëpushim. Propozim i cili u bë pak ditë më parë nga presidenti i SHBA-ve, Joe Biden.
Katërmbëdhjetë anëtarë të këshillit votuan për rezolutën dhe vetëm Rusia abstenoi.
Propozimi përcakton kushtet për një “armëpushim të plotë”, lirimin e pengjeve të mbajtura nga Hamasi, kthimin e eshtrave të pengjeve të vdekur dhe shkëmbimin e të burgosurve palestinezë.
Plani përfshin tre faza që do të përfundonin me një plan rindërtimi shumëvjeçar për Gazën, e cila është shkatërruar kryesisht për shkak të luftimeve.
Faza e parë e planit ka të bëjë me një shkëmbim pengje-të burgosurish si dhe armëpushim afatshkurtër.
Faza e dytë përfshin një “përfundim të përhershëm të armiqësive”, si dhe një tërheqje të plotë të forcave izraelite nga Gaza, sipas një teksti të projekt-rezolutës së SHBA.
Faza e tretë fokusohet në perspektivën afatgjatë të zonës dhe do të nisë një plan rindërtimi shumëvjeçar për Gazën.
