Kreu i Lëvizjes Bashkë, Arlind Qori, ka përsëritur qëndrimin e tij për të mos bashkëpunuar me parti të tjera, duke përjashtuar mundësinë e një aleance me Adriatik Lapajn. Sipas Qorit, vendimi për të hyrë në zgjedhje vetëm me listën dhe siglën e Lëvizjes Bashkë është marrë nga Këshilli Koordinues i partisë.
“Nuk gjejmë të ngjashëm me veten në spektrin partiak shqiptar, qoftë për karakterin, guximin, raportin me të vërtetën, apo qëndrimin ndaj oligarkisë dhe përparësive që kemi për çështjet e punës dhe pensioneve,” tha Qori.
Ndërkohë, Adriatik Lapaj kishte shprehur gatishmërinë për bashkëpunim duke theksuar se kishte lënë egon mënjanë, megjithëse kishte vërejtje për sjelljen e deritanishme të palës tjetër.
Qori u ndal edhe te çështja e dërgimit të denoncimeve në SPAK, duke theksuar se kjo nuk është detyrë e një partie politike.
“Nuk mendoj se detyra e një partie është të bëjë prokurorin apo gazetarin investigativ. Ne japim një alternativë. Nuk njoh asnjë parti në botë që shkon tek SPAK me dy copa letër. Është kthyer në një tur propagandistik. Problemet i zgjidhim duke organizuar njerëzit dhe duke i përfaqësuar politikisht,” përfundoi ai.
