Drejtori i Shkollës së Magjistraturës, Arben Rakipi, deklaroi dje në një emision televiziv se po i bëhet shantazh për shkak të funksionit të tij. Rakipi pretendoi se këto shantazhe vijnë nga pesë magjistratë të përjashtuar, të cilët, sipas tij, u larguan nga shkolla për shkak se u kapën duke kopjuar gjatë provimit.
“Janë përjashtuar 5 studentë sepse kanë kopjuar gjatë provimit. Kjo ka qenë një ngjarje e pazakontë në shkollën tonë, dhe përjashtimi i tyre ka ardhur si rezultat i shkeljes së Kodit Etik dhe Integritetit, tek i cili ne besojmë që magjistrati duhet të ketë. Shkelja e rëndë ka reflektuar pikërisht atë dobësi që sapo thashë – lehtësinë me të cilën trajtohet ligji, duke mos dhënë shpresë që gjyqtari i ardhshëm të ketë këtë lloj dinjiteti,” tha Rakipi.
Gjithashtu, ai denoncoi atë që e quajti “baltosje” dhe “shantazh”, duke pretenduar se kjo është një përpjekje për ta larguar nga detyra.
“Baltosja, e cila ka histori të gjatë dhe që lidhet pikërisht me luftën e të keqes kundër të mirës, vazhdon. Dhe unë, baltosjen, përveçse shantazh për t’u larguar nga punët, nuk e quaj ndryshe. Pra, doja të thoja që influenca vjen për këto arsye, jo sepse unë jam drejtor i Shkollës së Magjistraturës, jo pse jam ish-Prokuror i Përgjithshëm i këtij vendi, jo pse jam avokat,” tha ai.
Megjithatë, Rakipi nuk sqaroi në asnjë moment nëse i është drejtuar institucioneve për të denoncuar këto shantazhe. Ky fakt hedh pikëpyetje mbi besimin e tij në institucionet e drejtësisë, duke qenë se zgjedh t’i bëjë publike këto pretendime përmes mediave dhe jo përmes kanaleve ligjore.
Gjatë intervistës, Rakipi nuk dha asnjë shpjegim për skandalin e vitit të kaluar në Shkollën e Magjistraturës, ku fituesit e provimit u eliminuan me metoda të dyshimta dhe u zgjodhën emra të lidhur me pushtetin dhe interesa të tjera. A është kjo ngjarje e lidhur me pretendimet e tij për shantazh? Këtë pyetje mund ta sqarojnë vetëm organet e drejtësisë, me të cilat duket se drejtori i Shkollës së Magjistraturës ka zgjedhur të mos bashkëpunojë.
Në fund të intervistës, Rakipi foli me tone të përgjithshme për integritetin në gjyqësor, por në një kohë kur problematikat e drejtësisë janë të shumta, ai duhet të ndihet përgjegjës si një nga ekspertët kryesorë të Reformës në Drejtësi.
