Vila luksoze në kompleksin “White Rocks” në Dhërmi, e cila sipas SPAK është pasuri e fshehur e ish-zëvendëskryeministres Belinda Balluku, do të vijojë të mbetet nën sekuestro.
Gjykata e Posaçme e Apelit për Korrupsionin dhe Krimin e Organizuar, me trup gjykues monokratik të përbërë nga gjyqtarja Miliana Muça, pasi shqyrtoi ankimin e bërë nga ish-futbollisti i Kombëtares Igli Tare, vendosi ta rrëzojë atë dhe të lërë në fuqi sekuestron mbi vilën.
Prona figuron në emër të Tares, por SPAK thotë se ajo zotërohet në mënyrë të tërthortë nga Balluku, e cila dyshohet se e ka marrë si ryshfet nga kompania “Eurocol”, në kohën kur ishte drejtoreshë e “Alkontrol” dhe i ka dhënë tender kësaj kompanie.
Ish-numri dy i qeverisë, njëkohësisht ish-ministre e Infrastrukturës dhe Energjisë, Belinda Balluku po hetohet për abuzime me tenderat e rrugëve, korrupsion dhe pastrim parash.
