Ministri i Drejtësisë, Ulsi Manja, e ka pranuar ditën e sotme në Kuvend se amnistia liroi disa persona të dënuar nga Gjykata e Posaçme Kundër Korrupsionit dhe Krimit të Organizuar. Në interpelancën e sotme të kërkuar nga deputeti i PD, Enkelejd Alibeaj, ministri Manja tha se janë vetëm 8 persona të dënuar nga GJKKO që kanë përfituar dhe nuk kanë qenë zyrtarë të lartë.
"Nuk kam mashtruar askënd por kam shprehur publikisht qëndrimin e qeverisë për të mos amnistuar asnjë zyrtar apo ish- zyrtar të lartë të dënuar apo hetuar për korrupsion. Ata që kanë përfituar nga amnistuar me ulje dënimi dhe që janë dënuar nga GJKKO për korrupsion, janë shtetas të zakonshëm ose nëpunës në shërbim publik, janë vetëm 8 dhe asnjë prej tyre nuk është simbol i korrupsionit. 116 deputetë dhanë votë pro për këtë Amnisti" - tha Manja sot në Kuvend.
Deklarata e sotme tregon se ministri i Drejtësisë gënjeu një muaj më parë kur kërkonte votat për t’u miratuar amnistia. Atëherë ai shprehej se asnjë zyrtar i lartë që është i dënuar nga GJKKO apo po hetohet nga kjo gjykatë, nuk përfiton. Për më qartë po ju sjellim të plotë se çfarë deklaronte në një komunikim me gazetarët në 24 prill të këtij viti, nga ku ka folur për amnistinë penale.
"Ka patur një diskutim të madh se po lirohen shumë të dënuar. Asnjë zyrtar i lartë që është nën dënim nga GJKKO apo po hetohet nga kjo gjykatë, nuk përfiton nga amnistia. Janë një numër shumë i vogël nga administrata që përfitojnë vetëm ulje dënimi. Ndërsa përfitues nga amnistia që janë dënuar nga GJKKO apo Gjykata e Lartë nuk ka asnjë. Me këtë amnisti ne po i kursejmë buxhetit të shtetit 30 milionë euro. Shumica e këtyre që lirohen sot, kanë kryer 2/3 e dënimit apo edhe më shumë. Ndaj ata mund të shkojnë në shtëpi" – shprehej Manja atëherë.
Kujtojmë se amnistia penale u votua me 116 vota pas një marrëveshjeje mes mazhorancës dhe deputetëve të Rithemelimit. Edhe pse ministri Manja dhe deputeti i Rithemelimit, Gazment Bardhi e mbrojtën në Kuvend se nuk do të amnistoheshin zyrtarë të korruptuar, të hetuar dhe të dënuar nga SPAK dhe GJKKO, ishin mediat BIRN dhe INA Media që e zbuluan të kundërtën. Gjithashtu edhe vet institucioni i SPAK-ut deklaroi se ishin 100 persona të hetuar nga Prokuroria e Posaçme, që përfitonin nga amnistia penale. /VNA.al/
