Shtyrja pa fund e gjyqit për deputetin e PD Ervin Salianji fsheh pas vetes dhe nuancat e forta politike. Thuajse në çdo seancë bashkë me të akuzuarin shfaqen dhe deputetë të opozitës në mbështetje të tij. Më parë ata të grupimit të Bashës e tashmë deputetët e Rithemelimit. Mbështetja do konsiderohej shumë normale në kushtet e Shqipërisë, por përfshirja e Salianjit në krye të komisionit hetimor parlamentar për sistemin TIMS qartas konsiderohet si një tjetër shtysë për ti dhënë këtij të fundit amnistinë e fundit përballë Gjykatës së Apelit. Javët e fundit me gjithë paralajmërimet për të thirrur për të dëshmuar figurat kryesore të politikës, ky komision nuk ka ndërmarrë asnjë akt tjetër. Me protagonizmin e tij duket se Salianji nuk ka mundur ta pengojë trupën e Apelit për të marrë vendimin final që me gjasë do jetë i ngjashëm me vendimin e mëparshëm ndaj tij. Në fakt të dy komisionet hetimore të opozitës në parlament edhe pse kanë kaluar 2 muaj, thuajse gjysma e kohës që kanë në dispozicion deri më tani nuk kanë mundur të dalin në asnjë përfundim ose të paktën në ndonjë dëshmi apo dokument të qënësishëm. Më shumë se hetimore, puna e tyre ka rezultuar në retorikë politike. Nëse Gjykata e Apelit do të lerë në fuqi vendimin për Salianjin, ky i fundit do të detyrohet të lerë mandatin dhe ti nënshtrohet dënimit për veprën penale “dëshmi të rreme”.
