Altin Dumani ka dhënë sot intervistën e tij të parë televizive në dyvjetorin e marrjes së detyrës si drejtues i Prokurorisë së Posaçme dhe në 5-vjetorin e krijimit të SPAK. E nisur me emocione, por me sinqeritetin e dikujt që nuk ka eksperiencë dhe nuk preferon kamerat, intervista preku temat më të nxehta që nga korrupsioni, arrestimet, ndalimet dhe hetimet e zyrtarëve të lartë, krimin e organizuar dhe terrorizmin.
Me kostumin e prokurorit, zoti Dumani si profesionist nuk zbuloi asgjë të re lidhur me hetimet e nxehta, arrestimet e fundit apo atë çka do të ndodhë. Megjithatë, ai i dha përgjigje pyetjeve për sulmet e politikës, përfshirjen e kësaj të fundit në krim dhe korrupsion, mbështetjen e SHBA dhe BE apo edhe arrestimet e fundit ndaj bandave të rrezikshme me lidhje në Amerikën Latine.
Padyshim që intervista e parë televizive e një prej njerëzve më popullorë në Shqipëri ka ngjallur interes për publikun. Por, ndryshe nga shqiptarët, media tradicionale dhe ajo online nuk i ka kushtuar vëmendje përgjigjeve të Altin Dumanit. Ndoshta xhelozi dhe konkurrencë për shkak se kreu i SPAK zgjodhi ekranin e TVSH?
Do të ishte krejt e kuptueshme për shkak të interesit të madh që gjeneron çdo deklaratë e Altin Dumanit. Sikurse është po kaq e kuptueshme që në kohën kur pjesa dërrmuese e pronarëve të televizioneve në Shqipëri janë pjesë e dosjeve të SPAK, kreu i këtij institucioni nuk mund të shkelë në studiot e tyre.
Ndoshta Altin Dumani ka zgjedhur TVSH, jo sepse është televizioni më i ndjekur apo më profesional në Shqipëri. Por në kushtet kur TV private janë skema financiare me investime të dyshimta, TVSH mbetet i vetmi transmetues publik që paguhet me taksat e shqiptarëve.
Në botën e internetit dhe rrjeteve sociale, ky hezitim i medias tradicionale për të pasqyruar intervistën e kreut të SPAK, në rastin më të mirë mund të konsiderohet xhelozi për audiencë… dhe në rastin më të keq, me gjasë pronarët e medias do të mund ta shohin drejtuesin e Prokurorisë së Posaçme vetëm në zyrat e SPAK. Po, atje, pyetjet i bën Altin Dumani. Të tjerët duhet thjesht të përgjigjen.
