“Iu shpreh ngushëllimet e mia të ndjera familjeve që kanë humbur të afërmit. Dua të sqaroj aksidentin me 4 viktima. Kur makina më goditi nga pas betonieren, dola dhe tentova të hap dyert, por makina shpërtheu në flakë.”
Kështu e nisi dëshminë para gjykatës Aleksandër Krrashi, i cili doli për masë sigurie dhe ndaj tij u caktua “arrest me burg”.
Shoferi i betonieres, tek e cila u përplas makina dhe humbën jetën 4 të rinj – Enejdi Laçi, Andi Laçi, Erildi Laçi dhe Enrikejd Kurti – ka shpjeguar se kërkoi ndihmën e kompanisë së tij për të sjellë një tjetër betoniere me qëllim shuarjen e zjarrit.
“Lajmërova edhe familjarët e mi dhe shkova në shtëpi, u ndërrova dhe më pas u vetëdorëzova në prani të të afërmve në komisariatin e Kamzës,” tha Krrashi.
Gjykata caktoi “arrest me burg” edhe për Valentin Krrashin, i cili ndihmoi në largimin e shoferit të betonieres nga vendngjarja. Ndaj tij rëndon akuza e përkrahjes së autorit të krimit. Ndërsa Daniel Koxha u la në “detyrim paraqitjeje”.
Aksidenti në Fushë-Prezë ndodhi mesnatën e së enjtes, teksa 4 të rinjtë, dy prej të cilëve vëllezër, po ktheheshin nga Rinasi për në banesën e tyre. Automjeti i tyre u përplas me një betoniere të ndaluar anës rrugës, e cila nuk kishte as bllokazhin ndezur dhe as sinjalet e nevojshme, sikurse parashikon Kodi Rrugor
