Një aksident i rëndë rrugor ka ndodhur në orët e para të mëngjesit të 25 majit, pranë qytetit Koblenz në Gjermani, ku janë përfshirë disa shtetas shqiptarë. Lajmi është konfirmuar nga Ministria për Evropën dhe Punët e Jashtme të Shqipërisë.
Sipas njoftimit zyrtar, si pasojë e aksidentit kanë humbur jetën tre shtetas shqiptarë, ndërsa katër të tjerë kanë mbetur të plagosur dhe po marrin trajtim në spitalet lokale.
Ambasada e Shqipërisë në Berlin dhe Konsullata e Përgjithshme në Mynih janë vënë menjëherë në kontakt me autoritetet gjermane dhe po ndjekin nga afër hetimet për zbardhjen e rrethanave të ngjarjes.
Ministria ka shprehur ngushëllimet më të sinqerta për familjet e viktimave dhe ka uruar shërim të shpejtë për të plagosurit. Strukturat konsullore shqiptare në Gjermani kanë qenë të angazhuara gjatë gjithë ditës për të ofruar ndihmë dhe mbështetje për qytetarët e prekur nga ngjarja.
