Një aksident detar është regjistruar mbrëmjen e së hënës në Zakynthos të Greqisë, ku një anije turistike me 24 pasagjerë dhe dy anëtarë të ekuipazhit u përplas me blloqe betoni gjatë kthimit në portin e Agios Nikolaos Volimon.
Si pasojë e përplasjes mbetën të plagosur gjashtë pasagjerë. Pas mbërritjes së anijes në port, dy prej tyre u transportuan me ambulancë drejt Spitalit të Përgjithshëm të Zakynthos, ndërsa katër të tjerë u dërguan me automjete private për të marrë ndihmë mjekësore.
Pas trajtimit, pesë prej të plagosurve u larguan nga spitali, ndërsa një 60-vjeçar grek vijon të jetë i shtruar.
Autoritetet portuale arrestuan kapitenin 41-vjeçar grek të anijes. Ndaj tij janë ngritur akuza që lidhen, ndër të tjera, me ekspozimin ndaj rrezikut dhe shkaktimin e dëmtimeve trupore nga pakujdesia, si edhe me shkelje të legjislacionit detar.
Ndërkohë, anijes turistike i është ndaluar lundrimi deri në paraqitjen e dokumentacionit që vërteton aftësinë e saj për të lundruar në mënyrë të sigurt.
