Akademia Politike, PS trajnon deputetët e rinj. Nga Balla, tek Braçe e Rama, Xhafaj e Kuko, do të trajtojnë deputetët e sapozgjedhur për legjislaturën e re. Edi Rama nuk i lë asgjë rastësisë. Dhe kjo veçanërisht për performancën politike të deputetëve të rinj. Për këtë PS ka sjellë Akademinë Politike. Kështu, deputetët e rinj do rikthehen në "banka" për të mësuar sfidat e jetës parlamentare. Nisja e Akademisë Politike, një program intensiv trajnimi, është planifikuar për pasditen e së enjtes dhe synon t’i pajisë përfaqësuesit e rinj me njohuritë e nevojshme institucionale dhe politike. Sipas bashkëdrejtoreshës së këtij programi, Romina Kuko, nga 54 deputetët e rinj që janë bërë pjesë e Grupit Parlamentar të PS-së pas zgjedhjeve të 11 majit, vetëm 39 do të marrin pjesë në trajnim, për shkak se nuk kanë mbajtur më parë pozicione të larta shtetërore apo ministrore. “Kemi krijuar një format që u përshtatet më së miri nevojave të tyre. Kjo akademi synon të forcojë kuptimin institucional të funksionimit parlamentar dhe të përgatisë deputetët për rolin e tyre të ri”, – u shpreh Kuko për Top Channel. Trajnimi veror do të zgjasë 30 ditë dhe është i ndarë në pesë module kryesore, me pjesëmarrjen e figurave të njohura të Partisë Socialiste, përfshirë Edi Ramën, Taulant Ballën, Fatmir Xhafajn, Erion Braçen dhe Milva Ekonomin. Pesë modulet e Akademisë Politike: Roli Kushtetues i Deputetit dhe Etika e Përfaqësimit Lektorë: Edi Rama, Fatmir Xhafaj, Erion Braçe, Niko Peleshi Arkitektura e Kuvendit dhe Procesi Legjislativ Lektorë: Etilda Gjonaj, Klotilda Bushka, Toni Gogu Marrëdhëniet Ndërinstitucionale dhe Ndërkombëtare Lektorë: Elisa Spiropali, Adea Pirdeni, Olta Xhaçka Komunikimi Politik dhe Performanca Publike Lektorë: Taulant Balla, Endri Fuga, Eduard Shalsi PS dhe Vizioni 2030 Lektorë: Milva Ekonomi, Bledi Çuçi, Evis Kushi Kuko theksoi se kjo është një ndër nismat më të rëndësishme që PS ndërmerr për të siguruar një grup parlamentar të përgatitur, që e njeh funksionimin institucional dhe që është në gjendje të përfaqësojë denjësisht qytetarët. “Deputetët nuk janë thjesht zëra publikë, por ligjvënës, përfaqësues të qytetarëve dhe aktorë në marrëdhënie institucionale të ndërlikuara. Për këtë, trajnimi është i domosdoshëm”, – përfundon ajo.
